பாகிஸ்தான், சௌதி அரேபியா மற்றும் துருக்கி ஆகிய நாடுகள் இணைந்து புதிய வலுவான ராணுவக் கூட்டணியை உருவாக்கும் முயற்சியில் தீவிரமாக ஈடுபட்டு வருகின்றன. இந்த சூழலில், இக்கூட்டணியில் இரான் மற்றும் எகிப்து ஆகிய நாடுகள் இணைவது குறித்த முக்கிய சர்வதேசத் தகவல்கள் வெளியாகியுள்ளன.
மத்திய கிழக்கு மற்றும் ஆசியப் பிராந்தியத்தில் அதிகரித்து வரும் பாதுகாப்புச் சவால்களை எதிர்கொள்ள உருவாக்கப்படும் இந்த ராணுவ அமைப்பில், இரான் இணைய வேண்டுமானால் சில முக்கிய நிபந்தனைகள் பூர்த்தி செய்யப்பட வேண்டும் எனத் தெரிவிக்கப்பட்டுள்ளது. இதுபோன்ற சர்வதேச முக்கியத்துவம் வாய்ந்த உடன்படிக்கைகளில் இரானும் எகிப்தும் தவிர்க்க முடியாத சக்திகளாக விளங்குகின்றன.
எனினும், சாதாரண உறுப்பினர்களாக இணையாமல், கூட்டணியை உருவாக்கும் ‘இணை நிறுவன உறுப்பினர்களாக’ (Co-founding members) தங்களுக்கு இடம் அளிக்கப்பட வேண்டும் என இரான் தரப்பில் வலியுறுத்தப்பட்டுள்ளது. அதாவது, ராணுவக் கூட்டணியின் முதன்மை ஆவணங்கள் மற்றும் கொள்கைகள் வடிவமைக்கப்படும்போதே தங்களது ஆலோசனைகளும் கருத்துகளும் கட்டாயம் இடம்பெற வேண்டும் என்ற நிபந்தனையை இரான் முன்வைத்துள்ளது. இந்த நகர்வு சர்வதேச அரசியல் களத்தில் பெரும் விவாதத்தைக் கிளப்பியுள்ளது.