மத்திய கிழக்கு பகுதியில் போர் பதற்றம் நாளுக்கு நாள் தீவிரமடைந்து வரும் நிலையில், சௌதி அரேபியாவின் தலைநகர் ரியாத் மற்றும் செங்கடல் கடற்கரைப் பகுதியில் அமைந்துள்ள முக்கிய ஆற்றல் மையங்களை இலக்கு வைத்து ட்ரோன் மற்றும் பாலிஸ்டிக் ஏவுகணைத் தாக்குதல்களை நடத்தியதாக ஏமனின் ஹூத்தி அமைப்பினர் அறிவித்துள்ளனர். இரான் ஆதரவு பெற்ற இந்த ஹூத்தி போராளிகளின் தொடர் தாக்குதல்கள் சர்வதேச அளவில் பெரும் பரபரப்பை ஏற்படுத்தியுள்ளன. இந்தத் தாக்குதலைத் தொடர்ந்து, அமெரிக்கா ஹூத்தி அமைப்பினருக்குக் கடுமையான எச்சரிக்கையை விடுத்துள்ளது. பிராந்திய அமைதியைக் குலைக்கும் வகையில் செயல்படும் கிளர்ச்சியாளர்கள் மீது உரிய நடவடிக்கை எடுக்கப்படும் என்றும், சௌதி அரேபியாவின் பாதுகாப்பிற்கு அமெரிக்கா எப்போதும் உறுதுணையாக நிற்கும் என்றும் அமெரிக்க வெளியுறவுத்துறை தெரிவித்துள்ளது. சௌதி அரேபியாவின் எண்ணெய் சுத்திகரிப்பு நிலையங்கள் மற்றும் உள்கட்டமைப்புகள் மீதான இந்த தாக்குதலால் உலக அளவில் கச்சா எண்ணெய் விநியோகம் பாதிக்கப்படலாம் என்ற அச்சமும் எழுந்துள்ளது. இதனால் மத்திய கிழக்கில் மீண்டும் போர் மேகங்கள் சூழத் தொடங்கியுள்ளன.