உலகளவில் மிக முக்கியமான கடல்வழி வர்த்தகப் பாதையான ஹோர்மூஸ் நீரிணையை மீண்டும் திறப்பது தொடர்பாக இரான் மற்றும் அமெரிக்கா இடையே புதிய ஒப்பந்த முன்மொழிவு உருவாகியுள்ளது. இது குறித்து இரான் வெளியுறவுத் துறை அமைச்சர் அப்பாஸ் அராக்சி கூறுகையில், அமெரிக்காவுடன் எட்டப்படும் ஒப்பந்தத்தின் அடிப்படையில், ஒரே வாரத்தில் (7 நாட்களில்) ஹோர்மூஸ் நீரிணை கப்பல் போக்குவரத்துக்காக மீண்டும் திறக்கப்படும் என்று தெரிவித்துள்ளார்.
சர்வதேச அளவில் கச்சா எண்ணெய் போக்குவரத்தில் ஹோர்மூஸ் நீரிணை மிக முக்கியமான பங்கைக் கொண்டுள்ளது. மத்திய கிழக்குப் பகுதியில் நிலவி வரும் தீவிரப் பதற்றத்தைத் தணிக்கும் நோக்கில் இந்த முன்மொழிவு முன்வைக்கப்பட்டுள்ளது. இந்த ஒப்பந்தம் எட்டப்படும் பட்சத்தில், உலகளாவிய எண்ணெய் விநியோகம் சீராகி, சர்வதேச அளவில் நிலவும் பொருளாதாரச் சிக்கல்கள் மற்றும் எரிபொருள் விலை உயர்வு அச்சம் பெருமளவில் தணியும் என எதிர்பார்க்கப்படுகிறது.
இருப்பினும், இரானின் இந்த முன்மொழிவு குறித்து அமெரிக்கத் தரப்பில் இருந்து இதுவரை அதிகாரப்பூர்வ பதில்கள் எதுவும் வெளியாகவில்லை. உலக நாடுகளின் கவனத்தை ஈர்த்துள்ள இந்த நகர்வு, சர்வதேச அரசியலில் பெரும் திருப்புமுனையாகப் பார்க்கப்படுகிறது.