ஐக்கிய நாடுகள் பொதுச் சபைக் கூட்டத்தில் வழக்கமாக அமெரிக்கா, சீனா, ரஷ்யா போன்ற வல்லரசு நாடுகளின் தலைவர்கள் ஆற்றும் உரைகளே உலக நாடுகளின் கவனத்தை ஈர்க்கும். ஆனால், இந்த முறை நேபாள பிரதமர் பாலேந்திர ஷாவின் (பாலேன் ஷா) காரசாரமான உரை அனைவரையும் திரும்பிப் பார்க்க வைத்துள்ளது.
‘உலகில் போருக்கான ஏவுகணைகளும் ஆயுதங்களும் சரியான நேரத்திற்குச் சென்றடைகின்றன; ஆனால், மனிதநேய உதவிகளும் அமைதிக்கான முயற்சிகளும் எப்போதும் தாமதமாகவே வருகின்றன’ என்று அவர் ஆற்றிய உரை, வல்லரசு நாடுகளின் போக்கைக் கண்டிக்கும் வகையில் அமைந்திருந்தது.
போர் மற்றும் ஆயுதப் போட்டிகளுக்குக் கோடிக்கணக்கில் செலவிடும் உலக நாடுகள், பருவநிலை மாற்றத்தால் பாதிக்கப்படும் சிறிய நாடுகளுக்கும் வறுமையில் வாடும் மக்களுக்கும் போதிய முக்கியத்துவம் அளிப்பதில்லை என்ற அவரது விமர்சனம் சர்வதேச அளவில் பெரும் பாராட்டைப் பெற்றுள்ளது. வல்லரசுகளின் ஆதிக்கத்திற்கு இடையே, ஒரு சிறிய நாட்டின் தலைவராக நின்று உலகப் பிரச்சினைகளைத் தைரியமாகப் பேசிய பாலேன் ஷாவின் உரை தற்போது இணையத்தில் வைரலாகி வருகிறது.