இஸ்ரேல் அரசியல் களம் தற்போது சூடுபிடித்துள்ள நிலையில், நாட்டின் பிரதமர் பெஞ்சமின் நெதன்யாகு மற்றும் எதிர்க்கட்சித் தலைவர்களுக்கு இடையே கடுமையான வார்த்தை மோதல் வெடித்துள்ளது. வரவிருக்கும் இஸ்ரேல் தேர்தலில் எதிர்க்கட்சிகளுக்கு கத்தார் மற்றும் துருக்கி ஆகிய நாடுகள் நிதியுதவி அளிப்பதாகப் பிரதமர் நெதன்யாகு பகிரங்கக் குற்றச்சாட்டை முன்வைத்துள்ளார்.
நெதன்யாகுவின் இந்த குற்றச்சாட்டிற்கு இஸ்ரேலின் முன்னணி எதிர்க்கட்சித் தலைவரான காடி ஐசன்கோட் மற்றும் அரபு கட்சிகளின் தலைவர்கள் கடும் எதிர்ப்பு தெரிவித்துள்ளனர். இது குறித்துப் பேசிய எதிர்க்கட்சித் தலைவர்கள், வரவிருக்கும் தேர்தலில் தங்களின் தோல்வி பயம் காரணமாகவே நெதன்யாகு இதுபோன்ற ஆதாரமற்ற குற்றச்சாட்டுகளைச் சுமத்துவதாகச் சாடினர்.
மேலும், நாட்டின் உண்மையான பிரச்னைகளில் இருந்து மக்களின் கவனத்தைத் திசைதிருப்பவே நெதன்யாகு சர்வதேச நாடுகளைத் தொடர்புபடுத்திப் பேசுகிறார் என்றும், அவரது இந்தக் கருத்து நாட்டின் ஜனநாயகத்திற்கு ஆபத்தானது என்றும் எதிர்க்கட்சிகள் சுட்டிக்காட்டியுள்ளன. இந்த விவகாரம் இஸ்ரேல் அரசியலில் பெரும் பரபரப்பை ஏற்படுத்தியுள்ளது.