திருச்சி சிறப்பு முகாமில் தங்கியுள்ள உகாண்டா நாட்டைச் சேர்ந்த பெண் ஒருவர், தன் மீதான வழக்குகள் முடிவடைந்து தண்டனைக் காலம் பூர்த்தியான பிறகும் சொந்த நாட்டுக்குத் திரும்ப முடியாமல் தவித்து வருவதாக வேதனை தெரிவித்துள்ளார். முன்னதாக, திருச்சி சிறப்பு முகாமில் பணியிலிருந்த காவலர்களை மிரட்டியதாக இவர் மீது தொடரப்பட்ட வழக்கிலிருந்து நீதிமன்றம் இவரை முற்றிலும் விடுதலை செய்து உத்தரவிட்டது.
ஆனாலும், தொடர்ந்து பல்வேறு காரணங்களைக் கூறித் தனது பயணத்திற்குத் தடை விதிக்கப்படுவதாகவும், உகாண்டாவில் தனக்காகக் காத்திருக்கும் மகளைக் காண்பதற்குத் தான் உடனடியாகத் தாயகம் செல்ல வேண்டும் என்றும் அப்பெண் கண்ணீருடன் கோரிக்கை விடுத்துள்ளார். தண்டனைக் காலம் முடிந்த பிறகும் சிறப்பு முகாமில் தடுத்து வைக்கப்பட்டுள்ள இவரை, தூதரக உதவிகள் மூலம் விரைவாகச் சொந்த நாட்டுக்கு அனுப்ப அரசு நடவடிக்கை எடுக்க வேண்டும் என்ற கோரிக்கை வலுத்துள்ளது.