கணக்கைத் தாக்கல் செய்யும்போது பெரும்பாலான வரி செலுத்துவோர் வரி விலக்குகள் மற்றும் கழிவுகள் (deductions) மீது மட்டுமே கவனம் செலுத்துகின்றனர். இருப்பினும், வருமான வரிச் சட்டம் பல்வேறு பணப் பரிவர்த்தனைகள் மீதும் கடுமையான கட்டுப்பாடுகளை விதித்துள்ளது. நிர்ணயிக்கப்பட்ட வரம்பிற்கு மேல் ரொக்கப் பணத்தை எடுத்தாலோ, ரொக்கமாகக் கடன் பரிவர்த்தனைகளை மேற்கொண்டாலோ அல்லது சொத்து பரிவர்த்தனையில் பெரிய அளவிலான ரொக்கத் தொகையைப் பயன்படுத்தினாலோ கடுமையான அபராதங்களைச் சந்திக்க நேரிடலாம்.ரூ. 2 லட்சம் பரிவர்த்தனை!வருமான வரிச் சட்டத்தின் பிரிவு 186-ன் கீழ், ஒரு நபர் மற்றொரு நபரிடமிருந்து ஒரே நாளில் ரூ. 2 லட்சம் அல்லது அதற்கு மேற்பட்ட ரொக்கத்தைப் பெறக்கூடாது. உதாரணமாக, திருமணம் அல்லது சொத்து பரிவர்த்தனைக்காக ரூ. 2 லட்சத்துக்கு மேல் ரொக்கமாகப் பெறுவது விதிமீறலாகக் கருதப்படும். அவ்வாறு செய்வது, பிரிவு 451-ன் கீழ் பெறப்பட்ட ரொக்கத் தொகைக்கு இணையான கடுமையான அபராதம் விதிக்க வழிவகுக்கும்.20,000 ரூபாய்க்கு மேற்பட்ட ரொக்கக் கடன்!பிரிவு 185-ன் கீழ், எந்தவொரு நபரும் கடன் அல்லது வைப்புத்தொகையாக ரூ. 20,000 அல்லது அதற்கு மேற்பட்ட தொகையை ரொக்கமாகப் பெறக்கூடாது. அசையாச் சொத்து பரிமாற்றத்திற்கான முன்பணமும் இதில் அடங்கும். இத்தகைய அனைத்து பரிவர்த்தனைகளும் வங்கி வழிமுறைகள் அல்லது அங்கீகரிக்கப்பட்ட மின்னணு முறைகள் மூலமாகவே மேற்கொள்ளப்பட வேண்டும். இந்தப் பிரிவை மீறினால் பிரிவு 450-ன் கீழ் ரொக்கமாகப் பெறப்பட்ட தொகைக்கு இணையான அபராதம் விதிக்கப்படலாம்.கடன் மற்றும் வைப்புத்தொகை!கடன் அல்லது வைப்புத்தொகைகளை ரொக்கமாகத் திருப்பிச் செலுத்துவது தொடர்பாகக் கடுமையான விதிகள் உள்ளன. பிரிவு 188-இன் படி, ரூ. 20,000 அல்லது அதற்கு மேற்பட்ட கடன் அல்லது வைப்புத்தொகையை நீங்கள் ரொக்கமாகத் திருப்பிச் செலுத்த முடியாது. திருப்பிச் செலுத்துதல் என்பது 'அக்கவுண்ட்-பேயி' (account-payee) காசோலை, வங்கி வரைவோலை அல்லது டிஜிட்டல் முறைகள் மூலமாகவே செய்யப்பட வேண்டும். இந்த விதியை மீறினால், பிரிவு 453-இன் கீழ் திருப்பிச் செலுத்தப்பட்ட ரொக்கத் தொகைக்கு இணையான அபராதம் விதிக்கப்படலாம்.வணிகச் செலவுகளுக்கு 10,000 ரூபாய்!வணிகங்களுக்கான ரொக்கச் செலவுகள் மீதும் வரம்புகள் உள்ளன. பிரிவு 36(4)-இன் படி, ஒரு வணிகம் ஒரே நாளில் ஒரு தனிநபருக்கு 10,000 ரூபாய்க்கு மேல் ரொக்கமாகச் செலுத்தும் தொகைக்கு வரி விலக்கு கோர முடியாது. இருப்பினும், சரக்குப் போக்குவரத்துத் தொழிலில் ஈடுபட்டுள்ளவர்களுக்கு இந்த வரம்பு சற்று அதிகமாக உள்ளது. அவர்கள் ஒரே நாளில் ஒரு தனிநபருக்கு ரூ. 35,000 வரை ரொக்கமாகப் பணம் செலுத்தலாம்.ரொக்க நன்கொடைகளுக்கு வரி விலக்கு!நீங்கள் ஒரு நிறுவனத்திற்கு நன்கொடை அளித்தால் 2,000 ரூபாய்க்கு மேற்பட்ட ரொக்க நன்கொடைகளுக்குப் பிரிவு 133-இன் கீழ் எந்த வரி விலக்கையும் பெற முடியாது. இந்த வரி விலக்கைப் பெற, நீங்கள் எப்போதும் வங்கிச் சேவைகள் அல்லது டிஜிட்டல் கட்டண முறைகள் மூலமாகவே நன்கொடைகளை வழங்க வேண்டும்.ரொக்கம் எடுப்பதற்கான வரம்பு!உங்கள் வங்கிக் கணக்கிலிருந்து ரொக்கம் எடுப்பதற்குச் சட்டரீதியான வரம்பு எதுவும் இல்லை. ஆனால் TDS (மூலத்தில் வரி பிடித்தம்) விதிக்கப்படலாம். ஒரு நிதியாண்டில் நிர்ணயிக்கப்பட்ட வருடாந்திர வரம்பை மீறி ரொக்கத் தொகை எடுக்கப்பட்டால் வங்கிகள் அல்லது தபால் நிலையங்கள் TDS-ஐப் பிடித்தம் செய்ய வேண்டும் என்று பிரிவு 393(3) கட்டாயமாக்குகிறது. அதிக அளவிலான ரொக்கப் பரிவர்த்தனைகள் வருமான வரித் துறைக்கும் தெரிவிக்கப்படுகின்றன.தவணை முறையில் பணம் செலுத்துதல்!பெரிய ரொக்கப் பரிவர்த்தனையைச் சிறிய தொகைகளாகப் பிரிப்பதன் மூலம் விதிகளைத் தவிர்க்கலாம் என்று பலர் நினைக்கிறார்கள். ஆனால் அப்படி இல்லை. ஒரே பரிவர்த்தனை அல்லது நிகழ்வுடன் பல சிறிய ரொக்கப் பணப் பரிமாற்றங்கள் தொடர்புடையதாக இருந்தால் பிரிவு 186-இன் கீழ் அவை ஒரே பரிவர்த்தனையாகக் கருதப்படும். இந்த வரம்பை மீறினால் அபராதம் விதிக்கப்படும். வரி செலுத்துவோர் தங்கள் எதிர்காலப் பாதுகாப்பை உறுதிசெய்ய, எப்போதும் டிஜிட்டல் அல்லது வங்கி வழிமுறைகள் மூலமான பணப் பரிவர்த்தனைகளுக்கு முன்னுரிமை அளிக்க வேண்டும் என்று நிபுணர்கள் பரிந்துரைக்கின்றனர்.