ஈரோடு மாவட்டத்தைச் சேர்ந்த 17 வயது சிறுவன் ஒருவன், சமூக வலைத்தளமான பேஸ்புக் மூலம் இலங்கையின் மன்னார் பகுதியைச் சேர்ந்த பெண் ஒருவருடன் பழகி வந்துள்ளான். நாளடைவில் இந்த நட்பு காதலாக மாறிய நிலையில், தன் காதலியை நேரில் பார்க்க வேண்டும் என்ற தீவிர ஆசையில் அச்சிறுவன் ஆபத்தான முடிவை எடுத்துள்ளான். இதற்காகத் தனது வீட்டில் இருந்த தங்கச் சங்கிலியை யாருக்கும் தெரியாமல் எடுத்துக்கொண்டு ஈரோட்டில் இருந்து புறப்பட்டுள்ளான்.
இலங்கை செல்வதற்காக ராமேஸ்வரம் கடற்கரைப் பகுதிக்கு வந்த சிறுவன், அங்கிருந்த சட்டவிரோதப் படகு ஓட்டிகளிடம் தனது தங்கச் சங்கிலியைக் கூலியாகக் கொடுத்து, நள்ளிரவில் கடல் கடந்து இலங்கையின் மன்னார் பகுதிக்குச் சென்றுள்ளான். அங்கு காதலியைச் சந்திக்க வழியின்றிச் சந்தேகத்திற்கிடமான முறையில் சுற்றித் திரிந்த சிறுவனை, இலங்கை காவல் துறையினர் பிடித்து விசாரணை நடத்தினர். அப்போதுதான் காதலியைத் தேடி தமிழகத்தில் இருந்து ஆபத்தான முறையில் படகில் வந்த உண்மை தெரியவந்தது.
தற்போது அந்தச் சிறுவனைப் பாதுகாப்பாக மீட்டு, மீண்டும் இந்தியாவிற்கு அழைத்து வரத் தூதரக ரீதியான நடவடிக்கைகள் தீவிரப்படுத்தப்பட்டுள்ளன. முகநூல் காதலிக்காக எல்லையைத் தாண்டி ஆபத்தான பயணம் மேற்கொண்ட சிறுவனின் செயல் தமிழகத்திலும் இலங்கையிலும் பெரும் பரபரப்பையும் அதிர்ச்சியையும் ஏற்படுத்தியுள்ளது.