சளி மற்றும் காய்ச்சலுக்காக ஒரே நேரத்தில் இரண்டு விதமான மருந்துகளை உட்கொண்ட கல்லூரி மாணவர் ஒருவர், பாராசிட்டமால் நச்சுத்தன்மையால் தீவிரமாகப் பாதிக்கப்பட்டு, மீண்டும் பேசவும் நடக்கவும் கற்றுக்கொள்ள வேண்டிய பரிதாப நிலைக்குத் தள்ளப்பட்டுள்ளார். சளிக்கான பல மாத்திரைகள் மற்றும் திரவ மருந்துகளில் (Syrup) பாராசிட்டமால் சேர்க்கப்பட்டிருப்பதை அறியாமல், இரண்டையும் ஒரே நேரத்தில் உட்கொண்டதே இந்த ஆபத்தான நிலைக்கு முக்கியக் காரணமாகும்.
இதனால், அம்மாணவரின் உடலில் பாராசிட்டமால் அளவு அனுமதிக்கப்பட்ட அளவை விட பல மடங்கு அதிகரித்து, கல்லீரல் பாதிப்பு மற்றும் கடுமையான நரம்பியல் கோளாறுகளை ஏற்படுத்தியது. தீவிர சிகிச்சைப் பிரிவில் அனுமதிக்கப்பட்டு உயிருடன் மீண்ட போதிலும், உடலியக்க நரம்புகள் பாதிக்கப்பட்டதால் அவரால் இயல்பாகப் பேசவோ, நடக்கவோ முடியாமல் போனது. தற்போது முறையான பயிற்சிகள் மூலம் அவர் மீண்டும் ஒரு சிறு குழந்தையைப் போல நடக்க மற்றும் பேசப் பழகி வருகிறார்.
மருத்துவர்கள் இதுகுறித்துப் பேசுகையில், “மருத்துவரின் ஆலோசனையின்றி கடைகளில் சுயமாக மருந்து வாங்கி உட்கொள்வது ஆபத்தானது. குறிப்பாக ஒரே நேரத்தில் வெவ்வேறு பெயர்களில் உள்ள சளி மருந்துகளை உட்கொள்ளும்போது பாராசிட்டமால் நச்சுத்தன்மை (Paracetamol Toxicity) ஏற்பட வாய்ப்புள்ளது. எனவே, எந்த ஒரு மருந்தையும் சாப்பிடும் முன் அதில் உள்ள கூட்டுப்பொருட்களை கவனமாகச் சரிபார்க்க வேண்டும்” என்று எச்சரிக்கின்றனர்.