ஒருவரது தோல் நிறம், உயரம் அல்லது ஆங்கிலப் பேசும் திறனைக் கொண்டு அவரது பட்டியல் சாதி (SC) சான்றிதழை ரத்து செய்ய முடியாது என்று சென்னை உயர் நீதிமன்றம் அதிரடியான மற்றும் வரலாற்றுச் சிறப்புமிக்க உத்தரவைப் பிறப்பித்துள்ளது.
சென்னையைச் சேர்ந்த மத்திய அரசு ஊழியர் ஒருவர் தாக்கல் செய்த மனுவை விசாரித்தபோதே நீதிமன்றம் இந்தத் தீர்ப்பை வழங்கியது. மனுதாரர் வெள்ளையாக இருக்கிறார், உயரமாக இருக்கிறார் மற்றும் ஆங்கிலத்தில் சரளமாகப் பேசுகிறார் என்ற ஒரே காரணத்தைக் கூறி, அவரது சாதிச் சான்றிதழ் போலியானது என அதிகாரிகள் குழு ரத்து செய்திருந்தது. இதை எதிர்த்து அவர் சென்னை உயர் நீதிமன்றத்தில் வழக்குத் தொடர்ந்தார்.
இந்த வழக்கை விசாரித்த நீதிபதிகள், ஒருவரின் வெளிப்புறத் தோற்றம் அல்லது மொழியாற்றல் மட்டுமே அவரது சாதியைத் தீர்மானிக்காது எனக் கூறினர். நவீன சமுதாயத்தில் பட்டியல் சமூகத்தைச் சேர்ந்தவர்களும் சிறந்த கல்வியைப் பெற்று உயர்பதவிகளை வகித்து வரும் சூழலில், இத்தகைய நியாயமற்ற காரணங்களை முன்வைத்து சான்றிதழை ரத்து செய்வது ஏற்றுக்கொள்ள முடியாதது என்று கூறி, சான்றிதழ் ரத்து செய்யப்பட்ட உத்தரவை தள்ளுபடி செய்து உத்தரவிட்டனர்.