காபூல்: ஆப்கானிஸ்தானில் பெரியவர்களால் முடியாத மிகக் கடினமான மீட்புப் பணியை 11 வயது சிறுவன் ஒருவன் வெற்றிகரமாகச் செய்து முடித்து, உலகம் முழுவதும் உள்ள மக்களின் பாராட்டுகளைப் பெற்று வருகிறான். அங்குள்ள கிராமப் பகுதியில் 230 அடி ஆழமுள்ள குறுகிய ஆழ்துளைக் கிணற்றுக்குள் தவறி விழுந்த 5 வயது குழந்தையை மீட்க, தனது உயிரைப் பொருட்படுத்தாமல் அந்தச் சிறுவன் களமிறங்கினான்.
கிணற்றின் விட்டம் மிகவும் குறுகலாக இருந்ததால், பெரியவர்களால் உள்ளே செல்ல முடியாத சூழல் நிலவியது. இதனால் 11 வயது சிறுவனை கயிற்றின் மூலம் தலைகீழாக ஆழ்துளைக் கிணற்றுக்குள் இறக்கினர். அசாத்திய துணிச்சலுடன் 230 அடி ஆழத்திற்குச் சென்ற அச்சிறுவன், அங்கே உயிருக்குப் போராடிக் கொண்டிருந்த குழந்தையைப் பத்திரமாகப் பற்றிப் பிடித்து, காயங்களின்றி மீட்டு மேலே கொண்டு வந்தான்.
ஆப்கானிஸ்தான் போன்ற பகுதிகளில் இதுபோன்று ஆழ்துளைக் கிணறுகளில் சிக்கும் சிறுவர்களை மீட்க, பிற சிறுவர்களே தங்கள் உயிரைப் பணயம் வைக்கும் ஆபத்தான சூழல் நிலவி வருகிறது. இருப்பினும், மரண பயத்தை மீறி 5 வயது குழந்தையின் உயிரைக் காப்பாற்றிய இந்த 11 வயது சிறுவனின் சாதுரியத்தையும் வீரத்தையும் சமூக வலைத்தளங்களில் பலரும் வியந்து பாராட்டி வருகின்றனர்.