புதுடெல்லி: இஸ்லாம் மதத்திற்கு மாறிய ஒருவர், மதம் மாறுவதற்கு முன்பு கொண்டிருந்த சமூக அந்தஸ்தின் அடிப்படையில் பிற்படுத்தப்பட்ட வகுப்பினருக்கான (BC) இடஒதுக்கீட்டைப் பெற உரிமையில்லை என்று உச்ச நீதிமன்றம் அதிரடி தீர்ப்பு வழங்கியுள்ளது. இதன் மூலம் சென்னை உயர் நீதிமன்றம் ஏற்கனவே அளித்த வரலாற்றுச் சிறப்புமிக்க தீர்ப்பை உச்ச நீதிமன்றம் இன்று (அக்டோபர் 15) உறுதி செய்துள்ளது.
முன்னதாக, இந்து மதத்தில் பிற்படுத்தப்பட்ட வகுப்பைச் சேர்ந்த ஒருவர் இஸ்லாம் மதத்திற்கு மாறிய பிறகு, தனது முந்தைய சமூகப் பின்னணியைக் குறிப்பிட்டு அரசுப் பணியிடங்கள் மற்றும் கல்வி நிறுவனங்களில் இடஒதுக்கீடு சலுகை கோரினார். இந்த வழக்கை விசாரித்த சென்னை உயர் நீதிமன்றம், மதம் மாறிய பிறகு முந்தைய சாதி அல்லது சமூக அடையாளத்தின் அடிப்படையில் சலுகைகளைக் கோர முடியாது எனத் திட்டவட்டமாகத் தெரிவித்து மனுவைத் தள்ளுபடி செய்தது.
இத்தீர்ப்பை எதிர்த்து உச்ச நீதிமன்றத்தில் மேல்முறையீடு செய்யப்பட்ட நிலையில், சென்னை உயர் நீதிமன்றத்தின் உத்தரவில் எவ்வித தவறும் இல்லை எனக் கூறி, மேல்முறையீட்டு மனுவை உச்ச நீதிமன்றம் தள்ளுபடி செய்து உத்தரவிட்டது. இடஒதுக்கீட்டுக் கொள்கைகளின் அடிப்படையில் வழங்கப்பட்டுள்ள இந்தத் தீர்ப்பு, நாடு முழுவதும் பெரும் விவாதத்தையும் கவனத்தையும் பெற்றுள்ளது.