சென்னை மற்றும் அதன் புறநகர்ப் பகுதிகளில் கடந்த அக்டோபர் 17-ஆம் தேதி முதல் தொடர் கனமழை பெய்து வருகிறது. இதனால் நகரின் பல்வேறு பகுதிகள் வெள்ளக்காடாகக் காட்சியளிக்கின்றன. குறிப்பாக, சென்னை மற்றும் அதனைச் சுற்றியுள்ள ஆறு முக்கிய இடங்களில் 20 சென்டிமீட்டருக்கும் அதிகமான மழை அளவு பதிவாகியுள்ளது அதிகாரிகளை கடும் அதிர்ச்சியில் ஆழ்த்தியுள்ளது.
இதுகுறித்து வானிலை ஆய்வாளர்கள் கூறுகையில், “தற்போது பெய்து வரும் மழை வழக்கமான பருவமழை நிகழ்வு அல்ல; குறுகிய காலத்தில் அதிகளவில் கொட்டித் தீர்த்துள்ள கனமழையே இதற்குக் காரணம்” எனக் குறிப்பிட்டுள்ளனர். தாழ்வான பகுதிகளில் நீர் தேங்கியுள்ளதால், பொதுமக்களின் இயல்பு வாழ்க்கை பெரிதும் பாதிக்கப்பட்டுள்ளது.
இதனிடையே, அடுத்த 3 நாட்களுக்கான வானிலை முன்னறிவிப்பு வெளியாகியுள்ளது. அதன்படி, சென்னை, திருவள்ளூர், காஞ்சிபுரம் மற்றும் செங்கல்பட்டு ஆகிய மாவட்டங்களில் அடுத்த சில நாட்களுக்கு மிதமானது முதல் கனமழை தொடர வாய்ப்புள்ளதாகத் தெரிவிக்கப்பட்டுள்ளது. இதனால் பொதுமக்கள் அத்தியாவசிய தேவையின்றி வெளியே வர வேண்டாம் என்றும், முன்னெச்சரிக்கை நடவடிக்கைகளுடன் இருக்குமாறும் அரசு அறிவுறுத்தியுள்ளது.