சென்னை வண்டலூரில் உள்ள அறிஞர் அண்ணா உயிரியல் பூங்காவில் 7 நீர்வாழ் பறவைகள் திடீரென உயிரிழந்தன. மாதிரிப் பரிசோதனையில், அவை ‘ஹெச்5என்1’ (H5N1) வகை பறவைக் காய்ச்சல் நோய்த்தொற்றால் உயிரிழந்தது உறுதி செய்யப்பட்டுள்ளது. இதனைத் தொடர்ந்து, முன்னெச்சரிக்கை நடவடிக்கையாக அக்டோபர் 22 மற்றும் 23 ஆகிய தேதிகளில் வண்டலூர் உயிரியல் பூங்கா தற்காலிகமாக மூடப்பட்டு, கிருமி நாசினி தெளிக்கும் பணிகள் தீவிரமாக நடைபெற்று வருகின்றன.
இந்நிலையில், பறவைக் காய்ச்சல் மனிதர்களுக்குப் பரவுமா என்ற அச்சம் பொதுமக்கள் மத்தியில் எழுந்துள்ளது. பொதுவாக எச்5என்1 வைரஸ் பறவைகளிடையே மட்டுமே வேகமாகப் பரவக்கூடியது. இருப்பினும், பாதிக்கப்பட்ட பறவைகள், அவற்றின் எச்சம் அல்லது உமிழ்நீருடன் நேரடியாகத் தொடர்பில் இருக்கும் மனிதர்களுக்கு அரிதாகப் பரவ வாய்ப்புள்ளது என்று மருத்துவ நிபுணர்கள் தெரிவிக்கின்றனர்.
பொதுமக்கள் இதனால் தேவையற்ற அச்சமடையத் தேவையில்லை. முன்னெச்சரிக்கையாகத் திறந்தவெளியில் இறந்துகிடைக்கும் பறவைகளைத் தொடுவதைத் தவிர்க்க வேண்டும். மேலும், கோழிக்கறி மற்றும் முட்டைகளை நன்கு அதிக வெப்பநிலையில் வேகவைத்து உண்பதன் மூலம் இந்த வைரஸ் தொற்றில் இருந்து தங்களைப் பாதுகாத்துக் கொள்ள முடியும் என்று சுகாதாரத் துறை அறிவுறுத்தியுள்ளது.