இந்திய பங்குச் சந்தை வரலாற்றில் மிகப்பெரிய திருப்புமுனையை ஏற்படுத்தியவர் ரிலையன்ஸ் நிறுவனத்தின் நிறுவனர் தீருபாய் அம்பானி. சமீபத்தில் ரூ.30,213 கோடி மதிப்பிலான ஜியோ நிறுவனத்தின் ஐபிஓ (IPO) மாபெரும் சாதனை படைத்துள்ள நிலையில், 1977-ஆம் ஆண்டு தீருபாய் அம்பானி வெளியிட்ட ரிலையன்ஸின் முதல் ஐபிஓ மீண்டும் அனைவரின் கவனத்தையும் ஈர்த்துள்ளது.
அக்காலத்தில் பங்குச் சந்தை என்பது பெரும் பணக்காரர்களுக்கு மட்டுமேயான ஒன்றாகக் கருதப்பட்டது. ஆனால், அந்த பிம்பத்தை உடைத்தெறிந்த தீருபாய் அம்பானி, கிராமப்புறங்களிலும் சிறிய நகரங்களிலும் வாழ்ந்த சாமானிய நடுத்தர மக்களையும் பங்குச் சந்தையில் முதலீடு செய்ய ஊக்கப்படுத்தினார். 1977-இல் ரிலையன்ஸ் ஐபிஓ-வில் முதலீடு செய்யப்பட்ட வெறும் ரூ.1,000, நிறுவனத்தின் தொடர்ச்சியான வளர்ச்சி மற்றும் போனஸ் பங்குகளின் மூலமாக இன்று சுமார் ரூ.50 லட்சம் என்ற பிரம்மாண்ட தொகையாக உயர்ந்துள்ளது. சாமானியர்களின் நம்பிக்கையைப் பெற்று, அவர்களை நாட்டின் பொருளாதார வளர்ச்சியில் பங்கெடுக்க வைத்ததே தீருபாய் அம்பானியின் தொலைநோக்குப் பார்வைக்குக் கிடைத்த மாபெரும் வெற்றியாகும்.