திருச்சி சிறப்பு முகாமில் தங்கி உள்ள உகாண்டா நாட்டைச் சேர்ந்த பெண் ஒருவர், தனது தண்டனைக் காலம் முடிந்த பிறகும் சொந்த நாட்டுக்குத் திரும்ப முடியாமல் தவித்து வருவதாகக் கண்ணீர் மல்க தெரிவித்துள்ளார்.
முன்னதாக, திருச்சி சிறப்பு முகாமில் இருந்தபோது காவலர்களை மிரட்டியதாக இவர் மீது தொடரப்பட்ட வழக்கிலிருந்து நீதிமன்றம் தற்போது இவரை முழுமையாக விடுதலை செய்துள்ளது. இருப்பினும், தொடர்ந்து நிலுவையில் உள்ள பல்வேறு வழக்குகள் மற்றும் சட்ட நடைமுறைகள் காரணமாக, இவர் தாயகம் திரும்புவதில் தொடர் தாமதம் ஏற்பட்டு வருகிறது.
இது குறித்து மிகுந்த வேதனையுடன் பேசிய அப்பெண், “எனது பிறந்த நாட்டில் தனியாக தவிக்கும் என் சிறு வயது மகளுக்காக நான் உடனடியாக உகாண்டா செல்ல வேண்டும். தண்டனைக் காலம் முடிந்த பிறகும் இங்குத் தனித்து விடப்பட்டிருப்பது மனதளவில் பெரும் பாதிப்பை ஏற்படுத்துகிறது” எனத் தெரிவித்துள்ளார். இந்தச் சூழலில், அப்பெண்ணை விரைவாக தாய்நாட்டிற்கு அனுப்ப உரிய நடவடிக்கைகள் எடுக்கப்பட வேண்டும் என்ற கோரிக்கை எழுந்துள்ளது.