சென்னை: சென்னை காசிமேடு மீன்பிடித் துறைமுகத்திலிருந்து ஆந்திரக் கடல் பகுதிக்கு மீன்பிடிக்கச் சென்ற 9 மீனவர்கள் நடுக்கடலில் மாயமாகியுள்ள சம்பவம் அப்பகுதியில் பெரும் அதிர்ச்சியையும் சோகத்தையும் ஏற்படுத்தியுள்ளது.
காசிமேட்டைச் சேர்ந்த விசைப்படகில் கடந்த சில தினங்களுக்கு முன்பு 9 மீனவர்கள் ஆந்திர மாநில எல்லைக்கு உட்பட்ட நடுக்கடல் பகுதிக்கு மீன்பிடிக்கச் சென்றுள்ளனர். அவர்கள் மீன்பிடித்துக் கொண்டிருந்த நிலையில், திடீரெனக் கட்டுப்பாட்டு அறையுடனான தொடர்பை இழந்துள்ளனர். கடந்த 48 மணி நேரத்திற்கும் மேலாக அவர்களிடமிருந்து எந்தவிதத் தகவலும் கிடைக்காததால், அவர்களின் குடும்பத்தினரும் உறவினர்களும் கடும் கவலையில் ஆழ்ந்துள்ளனர்.
இதுகுறித்து விசைப்படகின் உரிமையாளர் கூறுகையில், “மீனவர்களைத் தொடர்புகொள்ள அனைத்து வழிகளிலும் முயற்சி செய்து வருகிறோம். எனினும் இதுவரை அவர்களைப் பற்றிய எந்தத் தகவலும் கிடைக்கவில்லை. மத்திய, மாநில அரசுகள் உடனடியாகக் கடலோரக் காவல் படை மூலம் தேடுதல் பணியைத் தீவிரப்படுத்தி, மாயமான மீனவர்களை விரைவாக மீட்க வேண்டும்” என வேதனையுடன் கோரிக்கை விடுத்துள்ளார்.