பெங்களூருவில் கார்கேவுடன் திடீர் சந்திப்பு: நடந்தது என்ன?
கடந்த சில நாட்களாகவே தமிழக காங்கிரஸில் தலைமை மாற்றம் வரப்போகிறது என்ற ஊகங்கள் பேசப்பட்டு வந்தன. அதனை உறுதிப்படுத்தும் வகையில், தமிழ்நாடு காங்கிரஸ் கமிட்டி தலைவர் செல்வப்பெருந்தகை திடீரென கர்நாடக மாநிலம் பெங்களூருவுக்கு பயணம் மேற்கொண்டார்.அங்கு அகில இந்திய காங்கிரஸ் கமிட்டி (AICC) தலைவர் மல்லிகார்ஜுன் கார்கேவை நேரில் சந்தித்து நீண்ட ஆலோசனையில் ஈடுபட்டார். இந்த சந்திப்பின் போது, தன்னை மாநில தலைவர் பொறுப்பில் இருந்து விடுவித்துவிட்டு, வேறு ஒருவரை தலைவராக நியமிக்கலாம் என்ற தனது விருப்பத்தை கார்கேவிடம் செல்வப்பெருந்தகை அதிகாரப்பூர்வமாக முன்வைத்துள்ளதாக தகவல்கள் தெரிவிக்கின்றன.
உள் கட்சிப் பூசலா? டெல்லி தலைமையின் அதிரடி முடிவு என்ன?
கட்சிக்குள் நிலவும் சில அதிருப்திகளே இந்த முடிவுக்கு முக்கியக் காரணம் என்றும் அரசியல் விமர்சகர்கள் கருதுகின்றனர். தொகுதிப் பங்கீடு, வேட்பாளர் தேர்வு மற்றும் கட்சியின் சில முக்கிய முடிவுகளில் மூத்த நிர்வாகிகளுடனும், சில நாடாளுமன்ற உறுப்பினர்களுடனும் (MPs) செல்வப்பெருந்தகைக்கு சுமுகமான உறவு இல்லை என்ற பேச்சு நீண்ட நாட்களாகவே நிலவி வருகிறது.செல்வப்பெருந்தகையின் இந்த திடீர் கோரிக்கையை கேட்ட மல்லிகார்ஜுன் கார்கே, தற்போதைய அரசியல் சூழலில் அவசரப்பட்டு எந்த முடிவும் எடுக்க வேண்டாம் என்றும், அதுவரை தலைவர் பதவியில் அவரே தொடர வேண்டும் என்றும் அறிவுறுத்தியுள்ளார்.எனினும், டெல்லி மேலிடம் தமிழக காங்கிரஸின் அடுத்தகட்ட நகர்வுகள் மற்றும் புதிய தலைவர் நியமனம் குறித்து ஆலோசித்து வருவதாகவும், இந்த மாத இறுதிக்குள் தமிழக காங்கிரஸுக்கு புதிய முகத்தை தலைவராக அறிவிக்க வாய்ப்புள்ளதாகவும் கூறப்படுகிறது.