இலங்கையின் கொழும்பு துறைமுகத்தில் அமையவிருந்த பிரம்மாண்ட தளவாட மையக் கூட்டுத் திட்டத்திலிருந்து (Colombo Port Logistics Centre) சீன அரசு நிறுவனமான ‘சைனா மெர்ச்சன்ட்ஸ் போர்ட் ஹோல்டிங்ஸ்’ (China Merchants Port Holdings) அதிகாரபூர்வமாக விலகியுள்ளது. சுமார் 392 மில்லியன் அமெரிக்க டாலர் மதிப்பிலான இந்த மெகா திட்டத்திலிருந்து சீனா திடீரென வெளியேறியிருப்பது, சர்வதேச அளவில் பெரும் பரபரப்பை ஏற்படுத்தியுள்ளது.
பொருளாதார நெருக்கடியில் இருந்து மெல்ல மீண்டு வரும் இலங்கைக்கு, இத்திட்டம் வர்த்தக ரீதியாக ஒரு முக்கிய தூணாகப் பார்க்கப்பட்டது. கொழும்பு துறைமுகத்தை தெற்காசியாவின் மிகப்பெரிய வர்த்தக மையமாக மாற்ற திட்டமிடப்பட்டிருந்த வேளையில், சீனாவின் இந்த முடிவு இலங்கை பொருளாதாரத்திற்குப் பெரும் பின்னடைவாகக் கருதப்படுகிறது. முதலீட்டு விதிமுறைகள் மற்றும் ஒப்பந்தப் பேச்சுவார்த்தைகளில் ஏற்பட்ட முரண்பாடுகளே சீனா விலகக் காரணம் எனக் கூறப்படுகிறது. இதனால் கொழும்பு துறைமுகத்தின் எதிர்கால வளர்ச்சி பெருமளவில் பாதிக்கப்படும் எனப் பொருளாதார வல்லுநர்கள் எச்சரிக்கின்றனர்.