சேலம் பாலியல் விவகாரம்
- மார்க்சிஸ்ட் கம்யூனிஸ்ட் கட்சியின் மாநில செயலாளர் பெ. சண்முகம் விடுத்துள்ள அறிக்கையின்படி, சேலம் மாநகரப் பகுதியில் மணிகண்டன் என்ற நபர் இந்த தொடர் பாலியல் குற்றங்களில் ஈடுபட்டு வந்துள்ளார்.
- பாதிக்கப்பட்ட 50-க்கும் மேற்பட்ட பெண்களை இந்த மணிகண்டன் என்பவர் மிக தந்திரமாக ஆபாசமாக வீடியோ எடுத்துள்ளார்.
- பின்னர் அந்த வீடியோக்களைக் காட்டி, பெண்களைத் தொடர்ந்து மிரட்டி பாலியல் வன்கொடுமையில் ஈடுபடுத்தியதோடு மட்டுமில்லாமல், அவர்களைக் கட்டாயப்படுத்தி பாலியல் வணிகத்திலும் தள்ளியுள்ளார்.
- இந்த விவகாரம் தற்போது வெளிச்சத்திற்கு வந்துள்ளதைத் தொடர்ந்து, முதன்மைக் குற்றவாளியான மணிகண்டனை போலீசார் கைது செய்துள்ளனர்.
இதன் பின்னணியில் பெரிய கும்பல் இருக்கிறது – சிபிஐ(எம்)
மணிகண்டன் கைது செய்யப்பட்டிருந்தாலும், இந்த வழக்கில் பல திடுக்கிடும் உண்மைகள் மறைந்திருக்கலாம் என்று சிபிஐ(எம்) மாநில செயற்குழு சந்தேகம் எழுப்பியுள்ளது. 50-க்கும் மேற்பட்ட பெண்களை மிரட்டி பாலியல் தொழிலில் தள்ளியுள்ளார் என்பதால், இதன் பின்புலமாக மிகப்பெரிய ஒரு குற்றக் கும்பல் செயல்பட்டிருக்கக் கூடும் என்று அறிக்கை சுட்டிக்காட்டுகிறது.எனவே, இந்த வழக்கின் ஆழத்தை உணர்ந்து, உள்ளூர் போலீசாரின் விசாரணையோடு நிறுத்தாமல் உடனடியாக சிபிசிஐடி (CB-CID) விசாரணைக்கு மாற்ற வேண்டும் என்று மார்க்சிஸ்ட் கம்யூனிஸ்ட் கட்சி தமிழக அரசை வலியுறுத்தியுள்ளது.
தவெக பிரமுகரா மணிகண்டன்?
இந்த வழக்கில் மற்றொரு முக்கிய திருப்பமாக, குற்றம் சாட்டப்பட்ட மணிகண்டன் அண்மையில் தேர்தலில் வென்று ஆட்சி அமைத்துள்ள த.வெ.க. (தமிழக வெற்றிக் கழகம்) கட்சியைச் சேர்ந்தவர் என்று ஊடகங்களில் செய்திகள் வெளியாகி வருகின்றன.இது குறித்து சிபிஐ(எம்) தனது அறிக்கையில், இந்த செய்தி உண்மையாக இருக்கும் பட்சத்தில், சம்பந்தப்பட்ட நபரை தவெக கட்சியிலிருந்து உடனடியாக நீக்க வேண்டும். ஆளும்கட்சி என்ற எவ்வித அரசியல் அழுத்தமும் இன்றி, காவல்துறை இந்த விசாரணையை மிக நேர்மையாகவும் சுதந்திரமாகவும் நடத்துவதை தமிழக அரசு உறுதி செய்ய வேண்டும் என்று மிகக் கடுமையாக வற்புறுத்தியுள்ளது.
பாதிக்கப்பட்ட பெண்களின் பாதுகாப்பு
- இச்சம்பவத்தால் பாதிக்கப்பட்ட பெண்களின் எதிர்காலத்தைக் கருத்தில் கொண்டு, மார்க்சிஸ்ட் கம்யூனிஸ்ட் கட்சி தமிழக அரசுக்கும் காவல்துறைக்கும் சில முக்கிய கோரிக்கைகளை முன்வைத்துள்ளது.
- பாதிக்கப்பட்ட பெண்கள் மற்றும் அவர்தம் குடும்பத்தினருக்கு உடனடியாக முழுமையான சட்ட மற்றும் சமூகப் பாதுகாப்பு வழங்கப்பட வேண்டும்.
- பாதிக்கப்பட்ட பெண்களின் அடையாளம், புகைப்படம் அல்லது அதுகுறித்த எந்தவொரு தனிப்பட்ட தகவல்களும் கசிந்துவிடாமல் காவல்துறை மிகக் கவனமாகப் பாதுகாக்க வேண்டும்.
இந்த கும்பலால் இன்னும் வேறு யாராவது பெண்கள் பாதிக்கப்பட்டு அச்சுறுத்தலில் இருக்கிறார்களா என்பது குறித்தும் விரிவான விசாரணை நடத்தி அவர்களைக் கண்டறிய வேண்டும் என வலியுறுத்தி உள்ளது.