கர்நாடக மூதாட்டியின் அசாத்திய பக்திப் பயணம்
திருப்பதி ஏழுமலையானை தரிசிப்பதற்காகக் கர்நாடக மாநிலத்தைச் சேர்ந்த 116 வயது மூதாட்டி லட்சுமவ்வா (உள்ளூரில் இவர் பீமவ்வா என்று அன்போடு அழைக்கப்படுகிறார்) திருமலைக்கு வந்துள்ளார். பொதுவாக, வயதானவர்கள் திருமலைக்குச் செல்லும்போது வாகனங்கள் மூலமாகவோ அல்லது மலைப்பாதையில் மனிதர்கள் சுமந்து செல்லும் நாற்காலி வசதி மூலமாகவோதான் செல்வது வழக்கம். ஆனால், தீவிர சிவ-விஷ்ணு பக்தையான லட்சுமவ்வா, ஏழுமலையானை தனது சொந்தக் கால்களால் நடந்து சென்றுதான் பார்க்க வேண்டும் என்பதில் உறுதியாக இருந்துள்ளார்.
3,550 படிகள்.. 9 கிலோமீட்டர் தூரம்!
இதனைத் தொடர்ந்து, திருப்பதியின் புகழ்பெற்ற மற்றும் மிக நீளமான அலிபிரி மலைப்பாதை வழியாக லட்சுமவ்வா தனது பயணத்தைத் தொடங்கினார்.மொத்தம் 3,550 செங்குத்தான படிகள்.சுமார் 9 கிலோமீட்டர் அடர்ந்த மலைப்பாதை.கையில் இருந்த ஒரே ஒரு சாதாரண கைத்தடி மட்டுமே.தள்ளாடும் வயதிலும், மூச்சு வாங்கும் செங்குத்தான மலைப்பாதைகளிலும் எவ்வித நவீன மருத்துவ அல்லது மனித உதவிகளும் இல்லாமல், கையில் ஒரு குச்சியை மட்டுமே ஊன்றுகோலாக வைத்துக்கொண்டு அவர் தொடர்ந்து நடந்துள்ளார். வழியில் இவரைப் பார்த்த சக பக்தர்கள் "கோவிந்தா.. கோவிந்தா.." என முழக்கமிட்டு அவருக்கு தங்களது மரியாதையைச் செலுத்தினர்.
பக்தர்களை நெகிழ்த்திய மன உறுதி
இன்றைய காலகட்டத்தில் இளைஞர்களே அலிபிரி மலைப்பாதையில் ஏறுவதற்குள் மூச்சுத் திணறி, ஆங்காங்கே அமர்ந்து ஓய்வெடுத்துச் செல்லும் நிலையில், 116 வயதைக் கடந்த மூதாட்டி ஒருவர் சற்றும் சளைக்காமல் முழு தூரத்தையும் நடந்தே கடந்து திருமலையை அடைந்துள்ளார்.திருமலையை அடைந்த அவர், ஏழுமலையானை மிக உருகி நின்று தரிசனம் செய்தார். தள்ளாடும் வயதிலும் மலையை வென்ற அவரது அசாத்தியமான மன உறுதியையும், கலங்காத பக்தியையும் கண்டு திருமலை திருப்பதி தேவஸ்தான (TTD) ஊழியர்களும் அங்கிருந்த ஆயிரக்கணக்கான பக்தர்களும் நெகிழ்ந்து போய் பாட்டியிடம் ஆசி பெற்றனர்.