அமெரிக்கா மற்றும் ஈரான் இடையே அதிகரித்து வரும் பதற்றம் இந்தியச் பங்குச் சந்தையில் நேரடி தாக்கத்தை ஏற்படுத்தியுள்ளது. போர் நிறுத்தத்தை முடிவுக்குக் கொண்டு வருவதாக அமெரிக்க அதிபர் டொனால்ட் டிரம்ப் வெளியிட்ட அறிக்கை சந்தையை கடும் சரிவுக்குள்ளாக்கியது. விற்பனை அழுத்தம் மிக அதிகமாக இருந்ததால் சென்செக்ஸ் 1,800 புள்ளிகளுக்கும் அதிகமாக சரிந்து 76,000 என்ற நிலையை எட்டியது. பிற்பகல் 2:50 மணி நிலவரப்படி, சென்செக்ஸ் 1,898.55 புள்ளிகள் (2.43 சதவீதம்) சரிந்து 76,282.17 ஆகவும், நிஃப்டி 50 குறியீடு 588.85 புள்ளிகள் (2.41%) சரிந்து 23,809.85 ஆகவும் வர்த்தகமாயின.வர்த்தக நேர முடிவில், 30 பங்குகளைக் கொண்ட பிஎஸ்இ சென்செக்ஸ் 1,677.12 புள்ளிகள் அல்லது 2.15 சதவீதம் சரிந்து 76,503.60 ஆகவும், என்எஸ்இ நிஃப்டி 50 குறியீடு 516.65 புள்ளிகள் (2.12 சதவீதம்) சரிந்து 23,882.05 ஆகவும் நிறைவடைந்தன. அமெரிக்கா - ஈரான் இடையிலான பதற்றம், பலவீனமான உலகளாவிய சூழல் மற்றும் கச்சா எண்ணெய் விலை உயர்வு ஆகியவை முதலீட்டாளர்கள் மத்தியில் பெரும் கவலையை ஏற்படுத்தியுள்ளன. இதற்கிடையில், ஈரானுடனான தற்காலிக போர் நிறுத்தம் முடிவுக்கு வருவதாக அமெரிக்க அதிபர் டொனால்ட் டிரம்ப் அறிவித்ததைத் தொடர்ந்து, இன்று சந்தை முழுவதும் பரவலான விற்பனை காணப்பட்டது.இன்று இந்திய பங்குச் சந்தை சரிவுடனேயே தொடங்கியது. மத்திய கிழக்கில் அமெரிக்கா மற்றும் ஈரான் இடையே அதிகரித்து வரும் பதற்றம் மற்றும் சர்வதேச சந்தைகளில் இருந்து வந்த எதிர்மறையான சமிக்ஞைகள் முதலீட்டாளர்களைப் பதற்றமடையச் செய்தன. இது சென்செக்ஸ் மற்றும் நிஃப்டி குறியீடுகளில் நேரடி தாக்கத்தை ஏற்படுத்தியது. சந்தை தொடங்கிய உடனேயே கடும் விற்பனை அழுத்தம் காணப்பட்டதால் சென்செக்ஸ் 78,000 புள்ளிகளுக்கும் கீழே சரிந்தது.காலை 9:15 மணியளவில், பிஎஸ்இ சென்செக்ஸ் 450.80 புள்ளிகள் (0.58 %) சரிந்து 77,729.92 ஆக வர்த்தகமானது. நிஃப்டி 50 குறியீடும் 123.40 புள்ளிகள் (0.51%) சரிந்து 24,275.30 ஆக இருந்தது. எண்ணெய் மற்றும் எரிவாயுத் துறை 1 சதவீதத்துக்கும் மேல் சரிந்து, மிகப்பெரிய வீழ்ச்சியைக் கண்டது. ஊடகம், பொதுத் துறை வங்கிகள், ரியல் எஸ்டேட், சிமெண்ட், உலோகம், ஆட்டோ மற்றும் நுகர்வோர் பொருட்கள் குறியீடுகளும் 1 சதவீதம் வரை சரிந்தன. இருப்பினும், மருந்து மற்றும் தகவல் தொழில்நுட்பத் துறைகள் வலுவாக வர்த்தகமாகி ஏற்றத்தில் காணப்பட்டன. நிஃப்டி பார்மா 0.73 சதவீதம் உயர்ந்தது. தகவல் தொழில்நுட்பத் துறையும் 0.25 சதவீதம் என்ற சிறிய ஏற்றத்தைக் கண்டது.சென்செக்ஸில், சன் பார்மா, எச்.சி.எல் டெக், இன்ஃபோசிஸ், டி.சி.எஸ், பவர் கிரிட் மற்றும் டெக் மஹிந்திரா ஆகிய பங்குகளில் வாங்குதல் காணப்பட்டது. அதே சமயம், இன்டர்குளோப் ஏவியேஷன் (இண்டிகோ), ஏசியன் பெயிண்ட்ஸ், மாருதி சுசுகி, எம்&எம், பஜாஜ் ஃபைனான்ஸ், எச்.யு.எல், அல்ட்ராடெக் சிமெண்ட், எஸ்.பி.ஐ, எல் & டி, கோடக் மஹிந்திரா வங்கி, டாடா ஸ்டீல் மற்றும் பார்தி ஏர்டெல் ஆகியவை நஷ்டமடைந்த பங்குகளில் அடங்கும். பெரிய நிறுவனப் பங்குகள் மட்டுமல்ல, நடுத்தர மற்றும் சிறிய நிறுவனப் பங்குகள் குறியீடுகளும் சரிந்தன.மத்திய கிழக்கில் அதிகரித்து வரும் பதற்றங்கள் கச்சா எண்ணெய் விலையில் உயர்வுக்கு வழிவகுத்துள்ளன. இது இந்தியப் பங்குச் சந்தையில் நேரடித் தாக்கத்தை ஏற்படுத்தியுள்ளது. அதிகரித்து வரும் எண்ணெய் விலையானது, எண்ணெய் சந்தைப்படுத்தல் நிறுவனங்கள் மற்றும் விமான நிறுவனப் பங்குகள் இரண்டிலும் சரிவுக்கு வழிவகுத்துள்ளது. பாரத் பெட்ரோலியம் (4.22 %), ஹிந்துஸ்தான் பெட்ரோலியம் (4.08 %) மற்றும் இந்தியன் ஆயில் (3.31 %) போன்ற எண்ணெய் நிறுவனங்களின் பங்குகள் குறிப்பிடத்தக்க சரிவைக் கண்டன. இதற்கிடையில், அதிகரித்து வரும் செயல்பாட்டுச் செலவுகள் குறித்த அச்சத்தின் காரணமாக, இன்டர்குளோப் ஏவியேஷன் விமான நிறுவனத்தின் பங்குகள் 1.46 சதவீதமும், ஸ்பைஸ்ஜெட் நிறுவனத்தின் பங்குகள் 0.78 சதவீதமும் சரிந்தன. மத்திய கிழக்கில் அமெரிக்காவுக்கும் ஈரானுக்கும் இடையே அதிகரித்து வரும் பதற்றங்கள் மற்றும் கப்பல்கள் மீதான தாக்குதல்கள் குறித்த செய்திகள் கச்சா எண்ணெய் விலையை உயர்த்தியுள்ளன. சர்வதேச சந்தையில், பிரென்ட் கச்சா எண்ணெய் ஒரு பீப்பாய்க்கு கிட்டத்தட்ட 3 சதவீதம் உயர்ந்து 76.39 டாலராகவும், WTI கச்சா எண்ணெய் 3 சதவீதத்துக்கும் அதிகமாக உயர்ந்து ஒரு பீப்பாய்க்கு 72.72 டாலராகவும் இருந்தது. மேலும், ஈரானின் எண்ணெய் விற்பனை உரிமத்தை அமெரிக்கா ரத்து செய்த செய்தி சந்தை உணர்வை கடுமையாகப் பாதித்தது. இதற்கிடையில், அமெரிக்க தொழில்நுட்பப் பங்குகளில் ஏற்பட்ட விற்பனை சரிவும், ஆசிய சந்தைகளில் நிலவிய கலவையான போக்கும் இந்திய முதலீட்டாளர்களின் மனநிலையைப் பாதித்துள்ளதாக நிபுணர்கள் கூறுகின்றனர்.