தமிழக அரசியல் களம் அடுத்தடுத்த அதிரடி திருப்பங்களைச் சந்தித்து வரும் நிலையில், தமிழ்நாடு காங்கிரஸ் கமிட்டியில் (TNCC) தற்போது ஒரு முக்கியத் தலைமை மாற்றம் அரங்கேறியுள்ளது. தமிழ்நாடு காங்கிரஸ் கமிட்டியின் புதிய தலைவராக விருதுநகர் நாடாளுமன்ற உறுப்பினர் பி. மாணிக்கம் தாகூர் நியமிக்கப்பட்டுள்ளார். அகில இந்திய காங்கிரஸ் கமிட்டி (AICC) இதற்கான அதிகாரப்பூர்வ அறிவிப்பை இன்று வெளியிட்டுள்ளது.இதற்கு முன்பு தலைவராக இருந்த கே. செல்வப்பெருந்தகை தனது பதவியை ராஜினாமா செய்ததைத் தொடர்ந்து, காங்கிரஸ் பேரியக்கத்தின் தலைவர் மல்லிகார்ஜுன கார்கே இந்த அதிரடி உத்தரவைப் பிறப்பித்துள்ளார்.

உடனடியாக அமலுக்கு வந்த உத்தரவு – கே.சி. வேணுகோபால் அறிவிப்பு

அகில இந்திய காங்கிரஸ் கமிட்டியின் பொதுச்செயலாளர் கே.சி. வேணுகோபால் (M.P.) வெளியிட்டுள்ள அதிகாரப்பூர்வ செய்தி அறிக்கையில், "மதிப்பிற்குரிய காங்கிரஸ் தலைவர், திரு. பி. மாணிக்கம் தாகூர் அவர்களை தமிழ்நாடு பிரதேச காங்கிரஸ் கமிட்டியின் தலைவராக உடனடியாக அமலுக்கு வரும் வகையில் நியமித்துள்ளார்" என்று குறிப்பிடப்பட்டுள்ளது.மேலும், அந்த அறிக்கையில் பதவியிலிருந்து விலகும் மாநிலத் தலைவர் திரு. கே. செல்வப்பெருந்தகை கட்சிக்கு ஆற்றிய பங்களிப்புகளைக் காங்கிரஸ் பேரியக்கம் மனதாரப் பாராட்டுகிறது என்றும் தெரிவிக்கப்பட்டுள்ளது.

செல்வப்பெருந்தகை விலகியதன் பின்னணி என்ன?

தமிழகத்தில் 2026 சட்டமன்றத் தேர்தல் முடிவுகள் வெளியானதில் இருந்தே, காங்கிரஸ் கட்சிக்குள்ளும் கூட்டணிக்குள்ளும் பல்வேறு அரசியல் நகர்வுகள் விவாதப் பொருளாக மாறி வந்தன. திமுக கூட்டணியில் இருந்து விலகி, முதலமைச்சர் விஜய் தலைமையிலான தமிழக வெற்றிக் கழகத்திற்கு (தவெக) ஆதரவளிக்கும் முடிவை மாநில காங்கிரஸ் எடுத்திருந்தது. இந்த அதிரடி நிலைப்பாட்டில் செல்வப்பெருந்தகைக்கு சில உடன்பாடுகள் இல்லை என்றும், அதனால் அவர் அதிருப்தியில் இருந்ததாகவும் அரசியல் வட்டாரங்களில் பேசப்படுகிறது.தேர்தல் முடிவுகளுக்கு முன்பே தான் பதவியிலிருந்து விலகத் தயாராக இருப்பதாக டெல்லி தலைமையிடம் செல்வப்பெருந்தகை தெரிவித்திருந்தார். அதன் தொடர்ச்சியாகவே இந்த முறைப்படியான ராஜினாமா மற்றும் புதிய தலைவர் நியமனம் நடைபெற்றுள்ளது.

மாணிக்கம் தாகூர் தேர்வு ஏன்? – டெல்லி தலைமையின் மாஸ்டர் பிளான்

விருதுநகர் தொகுதியில் இருந்து தொடர்ந்து நாடாளுமன்றத்திற்குத் தேர்வாகி வரும் பி. மாணிக்கம் தாகூர், ராகுல் காந்தி மற்றும் சோனியா காந்தியின் மிக நம்பிக்கைக்குரியவராக டெல்லி வட்டாரத்தில் பார்க்கப்படுகிறார். மாணவர் காங்கிரஸ் மற்றும் இளைஞர் காங்கிரஸ் காலம் தொட்டே கட்சிக்காக உழைத்து வரும் இவர், நாடாளுமன்ற காங்கிரஸ் கொறடா மற்றும் ஆந்திர மாநில காங்கிரஸ் பொறுப்பாளர் எனப் பல தேசிய அளவிலான பொறுப்புகளைக் கையாண்ட அனுபவம் மிக்கவர். தற்போது தமிழ்நாட்டில் தவெக மற்றும் காங்கிரஸ் இடையே உருவாகி வரும் புதிய அரசியல் அலைக்கு ஏற்ப, கட்சியை வலுப்படுத்தவும் கூட்டணியை சுமுகமாக வழிநடத்தவும் இவரே சரியான நபர் என டெல்லி தலைமை முடிவெடுத்துள்ளது.தமிழக அரசியல் களம் மிக வேகமாக மாறி வரும் இந்தச் சூழலில், மாணிக்கம் தாகூரின் புதிய தலைமை தமிழ்நாடு காங்கிரஸை அடுத்த கட்டத்திற்கு எப்படிக் கொண்டு செல்லப் போகிறது என்பதை அரசியல் விமர்சகர்கள் உன்னிப்பாகக் கவனித்து வருகின்றனர்.