மகளிர் டி20 உலகக் கோப்பை 2026 தொடரின் இறுதிப் போட்டியில், இங்கிலாந்து மகளிர் மற்றும் ஆஸ்திரேலிய மகளிர் அணிகள் மோதின. இப்போட்டியில், டாஸ் வென்ற, ஆஸ்திரேலிய மகளிர் அணி, முதலில் பந்துவீச்சைத் தேர்வு செய்தது.இங்கிலாந்து மகளிர் இன்னிங்ஸ்: முதலில் களமிறங்கிய இங்கிலாந்து மகளிர் அணியில், ஓபனர்கள் சிறப்பாக செயல்படவில்லை. அமி ஜோன்ஸ் 6 (6), டேனி வாட் ஹட்ஜ் 8 (9) ஆகியோர் அடுத்தடுத்து அவுட் ஆனதால், இங்கிலாந்து மகளிர் அணிக்கு, துவக்கத்திலேயே பின்னடைவு ஏற்பட்டது.இதனைத் தொடர்ந்து, கேப்டன் நாட் சிவர் பர்ன்ட், அணியை காப்பாற்றும் முயற்சியில் ஈடுபட்டார். இவர், இத்தொடர் முழுவதுமே நல்ல பார்மில் இருந்த நிலையில், பைனலிலும் சிறப்பாக விளையாடி, 53 பந்துகளில் 5 பவுண்டரிகள் உட்பட 58 ரன்களை சேர்த்தார்.மேலும், அலிஸ் கேப்ஸி 20 பந்தில் 23 ரன்களையும், இறுதிக் கட்டத்தில்ப்ரியா கெம்ப் மிரட்டலாக செயல்பட்டு, 28 பந்துகளில் 4 பவுண்டரி, ஒரு சிக்ஸர் உட்பட 44 ரன்களையும் எடுத்து அசத்தியதால், இங்கிலாந்து மகளிர் அணி, 20 ஓவர்கள் முடிவில் 150/4 ரன்களை குவித்து அசத்தியது.மகளிர் டி20 உலகக் கோப்பை இறுதிப் போட்டிகளில், எந்த அணியும், 150+ ரன்களை சேஸ் செய்தது இல்லை என்பதால், ஆஸ்திரேலிய மகளிர் அணி மீது எதிர்பார்ப்பு அதிகரித்தது.ஆஸி மகளிர் இன்னிங்ஸ்: இலக்கை துரத்திக் களமிறங்கிய ஆஸ்திரேலிய மகளிர் அணியில், ஓபனர், ஜார்ஜியா வெல் 6 பந்தில் 9 ரன்களை அடித்த நிலையில், அடுத்து பெத் மூனி மற்றும் லிட்சிபீல்ட் ஆகியோர் மிரட்டலாக செயல்பட்டு ரன்களை குவித்தார்கள். இதில், பெத் மூனி 49 பந்துகளில் 10 பவுண்டரி உட்பட 64 ரன்களை குவித்த நிலையில், லிட்சிபீல்ட் 35 பந்துகளில் 48 ரன்களை குவித்து அசத்தினார். இந்த இருவரும் பெரிய பார்ட்னர்ஷிப் அமைத்ததால், ஆஸ்திரேலிய அணியின் வெற்றி, 12 ஓவர்களுக்கு பிறகு, பிரகாசமாக தெரிந்தது.பிறகு, இறுதிக் கட்டத்தில், எலிஸ் பெர்ரி 12 பந்தில் 13 ரன்களை எடுத்து களத்தில் இருந்த நிலையில், ஆஸ்திரேலிய மகளிர் அணி, 17.1 ஓவர்கள் முடிவில் 153/3 ரன்களை எடுத்து, 7 விக்கெட்கள் வித்தியாசத்தில் வென்று, கோப்பையை தட்டித்தூக்கியது.ஆஸ்திரேலிய மகளிர் அணிக்கு, இது 7ஆவது டி20 உலகக் கோப்பையாகும். 2010, 2012, 2014, 2018, 2020, 2023, 2026 என 7 முறை கோப்பையை வென்றுள்ளனர். மற்ற அணிகள் எதுவும், 2 முறை கூட கோப்பையை வென்றதில்லை. 2009ஆம் ஆண்டில் இங்கிலாந்தும், 2016ஆம் ஆண்டில், மேற்கிந்தியத் தீவுகள் அணியும், 2024ஆம் ஆண்டில் நியூசிலாந்து அணியும் கோப்பையை வென்றிருக்கிறது.இங்கிலாந்து சாதனை தகர்ப்பு: இங்கிலாந்தில் நடைபெற்ற மகளிர் டி20 உலகக் கோப்பை போட்டிகளில், இங்கிலாந்து அணி தொடர்ச்சியாக 11 போட்டிகளிலும் வென்ற நிலையில், தற்போது பைனலில் ஆஸ்திரேலிய அணிக்கு எதிராக தோல்வியை சந்தித்துள்ளனர். மேலும், இங்கிலாந்தில் நடைபெற்ற மகளிர் ஐசிசி தொடர்களில், முதல் முறையாக இங்கிலாந்து அணி கோப்பையை வெல்லவில்லை.